Позната пејачка е обвинета за убиство откако го застрелала својот менаџер среде улица во Мајами.
Камерата го снимила застрашувачкиот момент кога Кевани Камила Хикс (27) испукала повеќе истрели кон својот менаџер во населбата Винвуд во Мајами на 9 октомври по кратка расправија на улица. На видеото се гледа како раперката, која настапува под уметничкото име Ки Вани, излегува од бел автомобил заедно со менаџерот, по што набрзо почнале да се расправаат и да се удираат. Се гледа и како уште еден маж се приклучува на расправијата.
Хикс во еден момент се оддалечила, но ненадејно се свртела и извадила пиштол од нејзината чанта по што отворила оган.
Менаџерот паднал на земја и се обидел да се засолни зад автомобил, но Хикс тргнала по него и пукала додека не престанал да мрда. Другиот маж влетал во автомобилот и ја прегазил пејачката, по што со голема брзина се оддалечил од местото. Хикс успеала да стане и да побегне.
Менаџерот бил пренесен во болница со повеќе прострелни рани, каде подоцна починал.
Хикс, која исто така била хоспитализирана поради повредите, ѝ рекла на полицијата дека пукала во самоодбрана и се плашела за својот живот.
– Обвинетата изјавила дека се исплашила поради големината на жртвата и кога ја слушнала и вели: „Ќе те убијам со еден удар“ – се наведува во полицискиот извештај за инцидентот, а пренесува NBC Miami.
Семејството на пејачката тврди дека Хикс и порано била мета на мажите од видеото.
Пејачката е во затвор, но се очекува да биде ослободена откако судијата на неодамнешното рочиште и одреди кауција од 50.000 долари и домашен притвор.
