Полициски патроли се поставени пред домот на Бенедикт де Пертуи, судијата кој ја осуди лидерката на француската крајна десница Марин Ле Пен на четири години затвор и забрана за кандидирање за јавни функции во следните пет години, соопшти денеска француското Министерство за надворешни работи.
Француските медиуми денеска објавија дека „судијата примил голем број пораки кои содржат јасно изразени лични закани“, пренесува порталот Politico.eu.
Судијата Де Пертуи претседаваше со тричлена комисија која, по судењето за проневера на средства од Европскиот парламент, донесе контроверзна пресуда против Ле Пен, осудувајќи ја на четири години затвор, од кои две може да одлежи во домашен притвор.
Дополнително, Ле Пен е казнета со 100.000 евра и забрана да се кандидира за избори во следните пет години.
По пресудата, сојузниците на Ле Пен низ Европа и во САД ја осудија одлуката на судот како недемократска, а американскиот претседател Доналд Трамп ја нарече пресудата „многу голем настан“.
Говорејќи на француската телевизија во понеделникот вечерта, Ле Пен рече дека Де Пертуи донел „политичка одлука“ и го прекршил законот.
Францускиот министер за правда Жералд Дарманен во понеделникот јавно го бранеше судијата Бенедикт де Пертоа.
„Заканите насочени кон судија се неприфатливи во демократијата и загрижувачки за независноста на судството“, рече Дерманен.
Претседателот на екстремно десничарската партија Национален собир, Џордан Бардела, ги повика Французите да протестираат против одлуката на судот викендов во Париз.
„Французите треба да бидат огорчени и јас им велам да бидат огорчени. Овој викенд ќе излеземе на улица“, изјави Бардела за радио Европа 1 и телевизијата CNews.
