„Со сета почит, ако чекавме Брисел да нѐ спаси, ќе бевме до гуша во вода“, рече Орбан на конференцијата утринава. Унгарија е последната земја во низата погодена од поплавите. 21 лице загина во Полска, Чешка, Австрија и Романија.
Орбан претходно оваа недела објави дека ги одложил своите меѓународни обврски додека поплавите не стивнат, вклучително и дебатата во Европскиот парламент за унгарското претседателство со Советот. Тој утрово се осврна на говорот на претседателката на Европската комисија, Урсула фон дер Лајен, која понуди помош.
„Доколку се појави ситуација во една земја, постои механизам кој може да се активира со еднострано известување. Ние го направивме тоа, што значи дека Брисел почна да испитува дали треба или може да се обезбеди некаква помош“, рече унгарскиот премиер.
„Кога овие комплицирани процедури во Брисел ќе завршат - и не сме казнети со тоа што не ја добиваме заслужената помош, бидејќи сето ова е под знак прашалник во Брисел - тогаш ќе добиеме помош“, додаде тој. Програмата на Европската унија за следење на климатските промени, Коперник, пред пет дена почна да испраќа сателитски снимки од поплавените области во Унгарија, на барање на Будимпешта.
Затоа, се претпоставува дека острите забелешки на Орбан може да бидат последица на претходната одлука на Европскиот суд на правдата да ја казни Унгарија со 200 милиони евра поради кршење на европскиот закон за азил, пишува Politico.
„Засега, да ја погледнеме позитивната страна на работите и со почит да му се заблагодариме на Брисел што барем мисли на нас“, заклучи Орбан.
