Во следните пет години може да се случат повеќе од 14 милиони дополнителни смртни случаи, околу 4,5 милиони кај деца под петгодишна возраст, поради големите намалувања на американската помош за странство, покажува студијата објавена во медицинското списание „Лансет“.
Истражувањето, спроведено од научници во Барселона и Салвадор да Баија, во Бразил, предупредува на континуираното намалување на странската помош што беше иницирано од американскиот претседател Доналд Трамп.
Тимот анализирал податоци за смртноста во повеќе од 130 земји и региони помеѓу 2001 и 2021 година, користејќи ги наодите за да ги предвиди исходите до 2030 година.
Нивните проекции сугерираат дека остриот пад на помошта од САД може да има катастрофални последици, особено во земјите со ниски и средни приходи.
Научниците ѝ припишуваат значајни подобрувања во глобалното здравје на американската Агенција за меѓународен развој (USAID), проценувајќи дека нејзините програми помогнале да се спречат речиси 92 милиони смртни случаи до 2021 година, вклучувајќи над 30 милиони деца под петгодишна возраст.
Значајно е што тие откриле дека напорите на USAID придонеле за намалување од 65 проценти на смртноста поврзана со ХИВ/СИДА и намалување од 51 процент на смртни случаи од маларија.
„Нашите проценки покажуваат дека, освен ако не се поништат острите намалувања на финансирањето најавени и спроведени во првата половина од 2025 година, до 2030 година би можело да се случи зачудувачки број на смртни случаи што може да се избегнат“, напишаа авторите во труд што вчера беше објавен во американското медицинско списание.
„Резултатскиот шок во многу земји би бил со слични пропорции на глобална пандемија или голем вооружен конфликт“, оценија авторите на истражувањето објавено во „Лансет“.
