Обновениот притисок од страна на американските, катарските и египетските медијатори за запирање на борбите во опустошената палестинска енклава доби на интензитет од неделата, кога Израел и Хамас започнаа индиректни разговори во главниот град на Катар, Доха, а израелскиот премиер Бенјамин Нетанјаху отпатува за Вашингтон.
Нетанјаху вчера се сретна со американскиот претседател Доналд Трамп, кој во пресрет на состанокот изјави дека прекин на огнот и договор за ослободување на заложниците може да се постигнат оваа недела. Израелскиот премиер денеска треба да разговара со американскиот потпретседател Џеј Ди Венс.
Пратеникот на Трамп за Блискиот Исток, Стив Виткоф, кој одигра клучна улога во изготвувањето на предлогот за прекин на огнот, ќе отпатува во Доха оваа недела за да се придружи на дискусиите таму, изјави вчера портпаролката на Белата куќа, Каролин Левит, за новинарите.
Предлогот за прекин на борбите повикува на постепено ослободување на заложниците, повлекување на израелските трупи од делови од Појасот Газа и дискусија за можноста за прекин на војната.
Хамас долго време бараше прекин на војната пред ослободување на преостанатите заложници. Израел, од своја страна, вели дека нема да се согласи на прекин на борбите сè додека не се ослободат сите заложници и не се распушти палестинската милитантна група. Се верува дека најмалку 20 од 50-те преостанати заложници во Газа се живи.
Палестински извори вчера изјавија дека постојат разлики меѓу страните околу прашањето за дозволување на хуманитарна помош во Појасот Газа.
Високи израелски функционери, на брифинг со новинарите во Вашингтон, изјавија дека финализирањето на договорите од Доха може да потрае повеќе од неколку дена, но не образложија за прашањата. Друг израелски функционер рече дека е постигнат напредок.
Израелскиот министер Зеев Елкин, член на безбедносниот кабинет на Нетанјаху, денеска изјави дека постои „значајна шанса“ да се договори прекин на огнот.
-Хамас сака да промени неколку централни прашања, не е лесно, но има напредок, изјави тој за израелскиот јавен радиодифузер Кан.
Војната започна на 7 октомври 2023 година, кога милитантите предводени од Хамас започнаа прекуграничен напад врз градови и кибуци во јужен Израел, убивајќи околу 1.200 луѓе и земајќи 251 заложник, кои ги одведоа во Појасот Газа. Оттогаш, во одмаздничката офанзива на Израел против Хамас загинаа повеќе од 57.000 Палестинци, според локалните здравствени власти.
