Кина ги зголемува своите залихи на нуклеарни боеви глави побрзо од која било друга земја, додавајќи 100 нуклеарни бомби годишно во својот арсенал, според неодамнешен извештај, кој проценува дека Кина сега има најмалку 600 нуклеарни боеви глави, пишува денеска весникот „Гардијан“.
Со сегашната стапка на зголемување, Кина би можела да има 1.500 нуклеарни боеви глави до 2035 година. Тоа е речиси исто колку што Русија и САД моментално имаат заедно такви нуклеарни боеви глави - подготвени за употреба.
Стотици постројки за интерконтинентални балистички ракети (ICBM), ракети со долг дострел што се користат за носење нуклеарно оружје, се градат во пустинските полиња на северна Кина. Три планински области во источна Кина веќе имаат оперативни силоси на ICBM, се наведува во извештајот.
Се смета дека Кина има 24 нуклеарни боеви глави веќе монтирани на ракети или во бази со оперативни сили, што значи дека би можеле да бидат распоредени во многу краток рок.
Кинескиот претседател Си Џинпинг го зголеми нуклеарниот арсенал на земјата побрзо од кој било друг кинески лидер. Претходните лидери, како што е Денг Сјаопинг, тврдеа дека на Кина ѝ се потребни само скромни резерви за да дејствува како средство за одвраќање на потенцијалните противници.
Портпаролот на кинеското Министерство за надворешни работи, Гуо Џиакун одби да коментира за извештајот, но рече: „Кина отсекогаш се придржувала до стратегијата за нуклеарна самоодбрана, отсекогаш ги одржувала своите нуклеарни сили на минималното ниво потребно за националната безбедност и не учествувала во трка во вооружување“.
