Во вчерашниот напад експлодираа воки-токи на борците на Хезболах, како и соларни панели на куќи. Во новите експлозии загинаа повеќе од 30 луѓе, но бројот може да се зголеми. За два дена беа ранети вкупно повеќе од 3.000, пренесе Индекс.
Израел најави почеток на „нова фаза од војната“. Прелиминарната истрага открила дека стотиците пејџери што експлодираа низ Либан биле однапред програмирани да се активираат, изјави за АФП извор од безбедносните сили. Изворот тврди дека податоците покажуваат дека уредите содржеле експлозивни материјали поставени до батеријата.
Израел ќе се соочи со „уништувачки одговор од оската на отпорот“, му рекол командантот на иранската Револуционерна гарда на шефот на Хезболах, пренесува иранската државна новинска агенција ИРНА.
Двајца израелски војници загинаа во близина на границата со Либан, соопшти израелската армија.
Израелските медиуми јавуваат дека еден војник загинал од дрон, а друг од противтенковска ракета.
Израел и Хезболах продолжија да разменуваат оган по смртоносните експлозии низ Либан во вторникот и средата.
Шефот на Хезболах Хасан Насрала зборуваше за тоа како тие имаат намера да одговорат.
„Во името на сите оние кои изгубија членови на семејството или беа повредени, во името на сите оние кои се бореа во име на Газа, им кажуваме на Нетанјаху и Галант, непријателот, дека либанскиот фронт нема да исчезне пред да заврши агресијата во Газа. “, рече тој.
„Јасно велам: без оглед на последиците, без оглед на жртвите, без оглед на сценаријата, нема да престанеме да го поддржуваме отпорот во Газа и Западниот Брег и сите повредени на окупираните територии“, додаде тој.
Тој тврди дека овонеделните напади низ Либан имале за цел да ја поткопаат инфраструктурата на милитантната група. Тој истакнува дека „израелскиот непријател“ ги планирал нападите за да предизвика поделби во Хезболах.
Тој потврди дека највисоките функционери на Хезболах не го носеле моделот на пејџерот што експлодирал. „Нашата инфраструктура не е потресена“, рече тој, нагласувајќи дека наместо тоа „таа е силна, моќна, кохерентна и не може да биде потресена од таков напад“.
„Нека знае непријателот дека она што се случи не ја разниша нашата вера, решителност, подготвеност или инфраструктура. Напротив, нè направи порешителни, посилни и поцврсти. Ако целта на Израел беше да не одвои од она што се случува во Газа, не успеа“, порача тој.
Тој директно му се обрати на израелскиот премиер Бенјамин Нетанјаху, велејќи дека Израел нема да може да ги врати своите граѓани на северот на земјата, долж границата со Либан, се додека траат борбите во Газа.
„Нема да можете да ги вратите луѓето од север на север... Ниту една воена ескалација, ниту убиства, ниту атентати и ниту една сеопфатна војна не може да ги врати жителите на границата со Либан“, рече тој.
Тој најави дека овонеделните напади ќе бидат дочекани со „праведна казна“. „Нема да зборувам за местото, времето, локацијата, деталите. Ќе знаете кога ќе се случи. Пресметката ќе се случи. Деталите нема да ги откриеме сега, бидејќи сме во многу чувствителна фаза од битката.“ го заврши својот говор Насрала.
