Меѓународната агенција за атомска енергија (МААЕ) вчера го засили притисокот врз Иран, усвојувајќи резолуција која бара одговори на нерешените прашања за нуклеарната програма на Техеран, јави ДПА.
Одборот на гувернери на агенцијата со седиште во Виена донесе резолуција со која му се наложува на шефот на агенцијата Рафаел Гроси да претстави детален извештај за прашањата во врска со нуклеарните активности на Иран.
Техеран брзо ја осуди резолуцијата, при што Министерството за надворешни работи и Иранската организација за атомска енергија издадоа заедничка изјава доцна синоќа.
Тие ја опишаа резолуцијата како „политички мотивирана“ и деструктивна, обвинувајќи ги нејзините западни поддржувачи дека ја користат како изговор за унапредување на „политички нелегитимните цели“ против Иран.
Како контрамерка, Иран ги објави плановите за воведување „голема колекција“ на напредни центрифуги за да се забрза збогатувањето ураниум.
Високо збогатениот ураниум е од суштинско значење за изградба на нуклеарни боеви глави, но Иран инсистира дека нема намера да создава нуклеарно оружје.
Инспекторите на МААЕ долго време бараа одговори од Техеран за нуклеарни траги кои навестуваат непријавени објекти или тајни минати активности.
Инспекторите на МААЕ долго време бараа одговори од Техеран за нуклеарни траги кои навестуваат непријавени објекти или тајни минати активности.
Сепак, постојаното одбивање на Иран да даде објаснувања предизвика „длабока загриженост“ кај одборот поради неговиот недостиг на соработка.
Резолуцијата, предложена од Германија, Велика Британија, Франција и САД, беше усвоена со 19 гласа „за“, 12 воздржани и против гласаа Русија, Кина и Буркина Фасо.
Иако самиот одбор на гувернери не може да спроведе казни, западните дипломати сугерираат дека извештајот на Гроси може да послужи како основа за поставување на прашањето до Советот за безбедност на Обединетите нации, кој има овластување да воведе нови санкции. /МИА
