Градоначалникот на Њујорк, Ерик Адамс, денеска ја започна својата кампања за реизбор како независен кандидат, по изненадувачкиот успех на кандидатот за градоначалник Зохран Мамдани на демократските прелиминарни избори претходно оваа недела, објави „Ју-Ес њуз“.
Адамс, кој ја напушти Демократската партија, не го именуваше Мамдани на почетокот на кампањата, но алудираше на некои од ставовите и минатото на потенцијалниот демократски кандидат.
-Овие избори се избор помеѓу кандидат од работничка класа и кандидат со сребрена лажица. Избор помеѓу некој што постигнал пониски стапки на криминал, повеќе работни места во историјата и повеќе станбена изградба во последните децении и пратеник кој не донел ниту еден закон, рече Адамс.
Адамс, кој се кандидираше и победи како демократ во својата прва кандидатура за градоначалник во 2021 година, доживеа пад на популарноста по обвинението за корупција и последователната одлука на Министерството за правда на американскиот претседател Доналд Трамп да го отфрли случајот.
Во април, тој објави дека ќе се кандидира за реизбор како независен кандидат, прескокнувајќи ги демократските прелиминарни избори на кои се соочија Мамдани и поранешниот гувернер на Њујорк, Ендру Куомо.
Тој го критикуваше Мамдани (33), пратеник во државното собрание од Квинс, велејќи дека му недостасува искуство и се залага за политики што не може да ги спроведе.
Трамп, роден њујорчанец, го нарече Мамдани „100 проценти комунистички лудак“ во објава на социјалните мрежи вчера.
Републиканскиот кандидат на изборите за градоначалник на Њујорк оваа есен ќе биде Кертис Слив, основач на организацијата „Ангели чувари“; поранешниот федерален обвинител Џим Волден ќе се кандидира како независен кандидат; Куомо, кој застана зад Мамдани на демократските прелиминарни избори, исто така наговести за можноста да се кандидира како независен.
