Гласањето недоверба го побара главната опозициска партија, Акција на незадоволни граѓани (позната по чешката кратенка АНО), предводена од поранешниот премиер Андреј Бабиш. Гласањето беше побарано откако се дозна дека Министерството за правда добило донација од биткоини, кои подоцна ги продало за една милијарда чешки круни (47 милиони долари) претходно оваа година.
Трите опозициски партии во чешкиот парламент - АНО, антиимигрантското движење „Слобода и директна демократија“ и либералната партија „Пирати“ - веројатно нема да успеат да ја соборат коалицијата од четири партии на конзервативниот премиер Петр Фиала, која има мнозинство во Долниот дом на чешкиот парламент.
Во срцето на скандалот со биткоини е фактот дека биткоините биле донирани на Министерството од човек кој претходно бил осуден за трговија со дрога и други кривични дела, и не е јасно зошто ја дал донацијата.
Опозицијата изјави дека може да станува збор за перење пари, бидејќи не е јасно со какви средства се купени биткоините и побара оставка од целата влада. Случајот го истражува службата за организиран криминал на чешката полиција.
Почнаа дебатите за гласањето недоверба во чешкиот парламент, а се очекува гласањето да се одржи доцна денес или утре.
Скандалот со криптовалутите се одвиваше само неколку месеци пред парламентарните избори закажани за 3 и 4 октомври оваа година. Се очекува партијата на Бабиш да победи на изборите.
