Генералот на суданската армија Абдел-Фатах Бурхан денеска го отфрли предлогот за прекин на огнот понуден од медијаторите предводени од САД, нарекувајќи го „најлош досега“, дополнително ослабувајќи ги меѓународните напори за ставање крај на разорната војна во Судан која трае повеќе од 30 месеци.
Медијаторите, познати како „Квартет“ - САД, Саудиска Арабија, Египет и Обединетите Арапски Емирати - се обидуваат две години да ги запрат борбите и да го вратат патот кон демократска транзиција, прекинат со воениот удар во 2021 година.
Во видео обраќање објавено од војската, Бурхан рече дека предлогот е неприфатлив и ги обвини медијаторите за пристрасност во напорите за запирање на конфликтот.
Судан е во граѓанска војна од април 2023 година, кога борбата за власт меѓу армијата и моќните паравоени Сили за брза поддршка (РСФ) прерасна во отворен конфликт во Картум и други делови од земјата.
ОН наведуваат дека повеќе од 40.000 лица досега се убиени, иако хуманитарните организации предупредуваат дека реалната бројка веројатно е многу поголема.
Конфликтот предизвика најголема хуманитарна криза во светот, а повеќе од 14 милиони лица ги напуштија своите домови, поттикнувајќи го ширењето на болести и туркајќи некои региони во глад.
Претходно овој месец, американскиот претседател Доналд Трамп изјави дека ќе посвети поголемо внимание на прекинувањето на војната во Судан, откако саудискиот престолонаследник Мохамед бин Салман го повика да се вклучи за време на посетата на Белата куќа.
Генералниот секретар на ОН, Антонио Гутереш, денеска повика на итен прекин на огнот и армијата и РСФ да започнат преговори за политичко решение.
На платформата X, тој рече дека е потребна и „безбедна и непречена испорака на хуманитарна помош“, како и прекин на испораката на оружје и борци во Судан.
„Ни треба мир во Судан“, нагласи Гутереш.
