„Тоа станува прашање околу кое се раѓа консензус“, изјави Божиновиќ по разговорот со новиот комесар за внатрешни работи и миграција, Магнус Брунер, пренесе Индекс.
„ЕУ бара иновативни решенија за управување со миграцијата и, меѓу другото, постои идеја барателите на азил чие барање е одбиено да се испраќаат во прифатни центри надвор од ЕУ, од каде што би чекале да бидат вратени во земјите на потекло.“
Божиновиќ рече дека на новиот комесар му рекол дека пред пет години предложил решение во таа насока на неговата претходничка, поранешната комесарка Илва Јохансон и дека тогаш немало слух за тоа.
„Мојата идеја беше административните процедури да се префрлат таму од каде што доаѓаат мигрантите, бидејќи е многу попрактично и похумано да му кажеш на некој што нема право на меѓународна заштита во ЕУ во неговата земја, отколку кога веќе доаѓа кон Европа, што потоа создава низа проблеми“, рече Божиновиќ
„Затоа, сигурен сум дека на крајот ова прашање ќе биде сфатено максимално сериозно и Хрватска ќе инсистира на тоа бидејќи е подобро, попрактично и похумано“, рече вицепремиерот и министер за внатрешни работи.
Во разговорот со Брунер се зборувало и за можен нов предлог за директива за враќање на илегалните мигранти.
„Враќањето е едно од најважните прашања и нешто мора да почне да се применува во пракса“, вели Божиновиќ, додавајќи дека во тоа поголема улога треба да има Агенцијата за европска гранична и крајбрежна стража (Фронтекс).
„Нашето мислење е дека Фронтекс треба повеќе да биде на терен и да се занимава со конкретни решенија за оние аспекти од мигрантската криза кои најмногу ја оптоваруваат Европа, а еден од нив секако е враќањето на илегалните мигранти“, рече тој.
Во 2019 година, земјите-членки постигнаа договор за предлогот за директива за враќање на илегалните мигранти, додека Европскиот парламент сè уште не го дефинира својот став за тоа. Сепак, мнозинството земји-членки денеска сметаат дека договорот од пред пет години е застарен и дека Европската комисија треба да излезе со нов предлог.
Во октомври, Австрија и Холандија подготвија нон-пејпер, кој беше поддржан од 15 други земји-членки на Шенген зоната, вклучително и Хрватска, и бара од Комисијата нов законски предлог за поефективно враќање на илегалните мигранти.
Божиновиќ е првиот министер за внатрешни работи кој го прими новиот комесар Брунер, до неодамна австриски министер за финансии.
