Земјите членки на Европската Унија ја одобрија предлог-мерката на Европската комисија за можна примена на царини на американски производи во вкупна вредност од 93 милијарди евра (околу 109,4 милијарди долари), доколку не успеат трговските преговори со САД, соопштија дипломатски извори за ДПА.
Мерките вклучуваат веќе усвоен список на производи вредни 21 милијарда евра, како и нова листа со дополнителни стоки вредни 72 милијарди евра.
Претседателот на САД, Доналд Трамп, неодамна најави воведување на 30 отсто царини на увозот од ЕУ, почнувајќи од 1 август.
И покрај одобрувањето на можни контрамерки, Унијата сѐ уште се надева на договорено решение во спорот со Вашингтон.
Трамп вчера изјави дека САД се подготвени да ги намалат најавените царини доколку ЕУ го отвори пазарот за американски компании.
- Ако се согласат да ја отворат Унијата за американски бизниси, тогаш ќе им наплатиме пониска царина, рече Трамп на настан посветен на вештачката интелигенција.
