Администрацијата на американскиот претседател Доналд Трамп започна „прелиминарни разговори“ за потенцијален договор за безбедност меѓу Сирија и Израел, објави американскиот новински портал Аксиос, повикувајќи се на американски и израелски претставници.
Аксиос наведува дека разговорите имаат за цел ублажување на тензиите на границата, нагласувајќи дека овој чекор би можел да го отвори патот за идни мировни разговори и нормализација на односите.
Според американски и израелски извори, Тел Авив врши притисок да се осигури дека секој дијалог ќе резултира со сеопфатен мировен договор, но смета дека остварувањето на напредокот ќе бара време, особено поради сложените прашања, како што е статусот на окупираната сириска Голанска Висорамнина, која Израел инсистира да ја задржи.
Специјалниот претставник на САД за Сирија, Томас Барак смета дека Владата на сирискиот претседател Ахмад ал-Шара не сака војна со Израел, затоа повика да се даде шанса на новата сириска администрација.
