Дерик загина во тешка несреќа на 66-годишна возраст, пишува Daily Mail.
- Нашиот татко, Дерик Мекинтајр, беше горд татко, сопруг, брат, син, вујко, дедо и пријател. Имаше страст за музиката, свирејќи на бас гитара поголемиот дел од својот живот и ги збогатуваше песните со неговиот груви бас на Jamiroquai, Roy Ayers, Beverly Knight и многу други. Тато беше голем човек кој влијаеше на многумина кои стапија во контакт со него, инспирирајќи ги и охрабрувајќи ги секогаш кога можеше. Ниту една количина на зборови не може да резимира колку нашиот татко беше посебен за сите нас - не само во нашите индивидуални односи, туку како целина. Засекогаш ќе ни недостасуваат неговата љубов, хумор и присуство и ќе продолжиме да ја шириме неговата светлина. Сѐ додека не се сретнеме повторно – се вели во соопштението на семејството.
Тој се прослави како дел од фанк и ацид џез бенд со пејачот Џеј Кеј, а загина на 2 февруари по несреќа со пет автомобили во Буши, Хертфордшир.
Полицијата во Хертфордшир ја потврди неговата смрт и соопшти дека апелира за повеќе информации. „Дерик Мекинтајр (66), кој живееше во Ватфорд, утрото на 2 февруари учествуваше во судир и за жал почина на местото на настанот. Нашите полицајци продолжуваат да ги утврдуваат целосните околности на овој инцидент и ние сè уште бараме информации. Доколку возевте во околината и видовте што се случило или ако имате снимки од камерата што би можеле да ни помогнат во истрагата, ве молиме контактирајте нѐ“, велат од полицијата.
Дерик му се придружи на познатиот бенд во 1994 година и почна да работи на нивниот втор албум „The Return of the Space Cowboy“, кој го достигна второто место на топ листите.
