Само два месеци по освојувањето на Африканскиот куп на нации на теренот, на играчите на Сенегал им беше одземен трофејот со шокантна одлука од Конфедерацијата на африкански фудбал (CAF). Во преседан што ги потресе темелите на африканскиот фудбал, CAF го поништи конечниот резултат и му ја додели титулата на Мароко, домаќинот на турнирот, на зелената маса. Одлуката предизвика поплава од лути реакции, од пркосни пораки од играчите до директни закани од сенегалската федерација.
Драматичното финале, одиграно на 18 јануари во Рабат, беше исполнето со тензии од самиот почеток. Натпреварот кулминираше во судиското продолжение кога, по интервенција на ВАР, на мароканскиот тим му беше досуден контроверзен пенал. Сенегалскиот тренер Папе Тиау ги повлече своите играчи од теренот и натпреварот беше прекинат речиси дваесет минути. Финалето изгледаше предодредено да заврши со скандалозен прекин, но капитенот Садио Мане ја презеде контролата. Тој ги убеди своите соиграчи да се вратат на теренот и да го завршат натпреварот. Неговите напори се исплатија. Голманот Едуард Менди одбрани слаб обид за „паненка“ од Брахим Дијаз, а натпреварот отиде во продолжение. Папе Гуеј постигна гол во 94-тата минута за победа од 1-0 и ја донесе на Сенегал втората последователна африканска титула.
Иако првичните санкции беа само парични, Мароканската фудбалска федерација поднесе жалба. Апелациониот совет на CAF ги прифати нивните аргументи и ги примени членовите 82 и 84 од правилникот, во кои се наведува дека екипата што го напушта теренот без дозвола од судијата се казнува со суспензија од натпревар. Резултатот беше официјално регистриран како 3-0 за Мароко, а Сенегал остана без трофејот што го славеа на теренот и во сопствената земја.
„Ова е невидена, неправедна и неприфатлива одлука што го срамоти африканскиот фудбал. Нема да се откажеме, законот е на наша страна“, соопшти Сенегалската фудбалска федерација, нарекувајќи ја пресудата „фарса“.
Извор од Сенегалската федерација отиде чекор понатаму, најавувајќи тотална војна, за францускиот весник Л`Екип.
“ Бесни сме. Состанокот на Извршниот комитет на CAF е на 29 март. Ќе биде Трета светска војна“.
Играчите, кои славеа со стотици илјади навивачи на улиците на Дакар, не го криеја својот гнев и неверица. Нивните реакции на социјалните мрежи беа пркосни и полни со сарказам. Ел Хаџи Малик Диуф објави стори на Инстаграм и напиша:
„Трофејот беше освоен на теренот, а не преку е-пошта. Добра ноќ.“
