Навивачите од неколку земји кои се натпреваруваат на овогодинешното Светско првенство ќе мора да положат гаранции до 15.000 долари за да добијат туристички визи за влез во Соединетите Американски Држави, објави „The Athletic“. Политиката ги засега граѓаните на Алжир, Зелен ’Рт, Сенегал и Брегот на Слоновата Коска. Сепак, ФИФА врши неофицијален притисок врз администрацијата на Трамп да направи исклучоци за играчите.
„Пилот-програмата за гаранција за визи“ опфаќа 50 земји, од кои пет се квалификуваа за Светското првенство. Тешкотиите се појавија откако граѓаните на одредени земји кои патуваат во Соединетите Американски Држави со деловни или туристички визи (познати како визи Б-1 и Б-2) беа предмет на барање за гаранции по промените во политиката од страна на администрацијата на претседателот Трамп.
Портпарол на Стејт департментот изјави за „The Athletic“ дека сите кандидати, без оглед на возраста, подлежат на истите законски стандарди и мора да покажат дека ги исполнуваат условите и имаат намера да ги почитуваат барањата за виза. Тој додаде дека оние кои ги напуштаат Соединетите Американски Држави навремено пред да им истече визата ќе добијат поврат на средствата. Исто така, беше разјаснето дека барањето за гаранција за виза не е ретроактивно и не важи за носители на веќе важечки визи.
Сепак, Пилот-програмата за гаранција за визи не вклучува формулација што би им дала имунитет на спортистите што учествуваат на големи спортски настани како што е Светското првенство. Спортистите кои сè уште немаат визи за САД првенствено ќе аплицираат за визи Б-1 или Б-2 за време на турнирот, што значи дека може да бидат обврзани да положат и гаранции. Стејт департментот соопшти дека сите апликации за виза ќе бидат разгледани од страна на персоналот на индивидуална основа.
Во политиката се наведува дека „нема постапка“ за апликантите да побараат откажување од гаранцијата, но конзуларните службеници можат да проценат дали таквото откажување „би послужило за значаен национален или хуманитарен интерес врз основа на целта на патувањето и вработувањето на апликантот“.
Кога беа прашани од „Атлетик“ оваа недела, ниту Стејт департментот ниту ФИФА не ја исклучија можноста играчите од дотичните земји да бидат обврзани да положат гаранција. ФИФА одби да коментира за сите аспекти на овој извештај.
Ситуацијата предизвикува загриженост кај фудбалските федерации на засегнатите земји. Извори, кои зборуваа под услов на анонимност за да ги заштитат своите односи, за „Асошиејтед прес“ изјавија дека прашањето е покренато со ФИФА за време на подготвителните семинари пред Светското првенство на кои присуствуваа федерациите учеснички овој месец во Атланта. На помалку од 80 дена до почетокот на Светското првенство, ФИФА се обидува да ја убеди администрацијата на Трамп да ги укине гаранциите за официјалните членови на делегациите на федерациите учеснички, меѓу кои веројатно би биле играчи, тренери, помошен персонал, како и лидери на федерациите и евентуално клучен персонал од спонзорите.
Претседателот на ФИФА, Џани Инфантино, постојано повторува дека Светското првенство оваа година во САД, Канада и Мексико ќе биде „најинклузивното“ во историјата на турнирот. Сепак, граѓанин на засегнатите земји кој инаку би имал право да влезе во САД, сега мора да има и средства да плати аранција од 5.000, 10.000 или 15.000 долари, што би можело да спречи или одврати многумина од патување.
