Англискиот напаѓач Енди Керол неодамна изненади со одлуката да продолжи да игра фудбал и потпиша со поранешниот француски првак Бордо, кој поради долгови е исфрлен во четвртата лига.
Корпулентниот напаѓач во францускиот клуб има мизерна плата, а во последното интервју истакна дека сака да игра фудбал и да ужива во него, бидејќи, очигледно веќе заработил доста пари.
Во медиумите протече информација дека Керол во Бордо игра за плата од 3500 евра месечно, а тој вели дека сумата е помала.
„Неколку новинари напишаа дека заработувам 3500 евра месечно. Не, нема врска. Цифрата е многу помала. Нема да кажам колкава, но можам да кажам дека откако живеам во Бордо, изнајмувам убава куќичка – а мојата плата е помала од киријата“, откри Керол.
Откри зошто решил да се врати на аматерскиот фудбал.
„Сакам предизвици. Разбирам зошто луѓето се изненадени. Јас сакам да играм фудбал и да уживам во него. Едноставно ова е нешто ново, Бордо е голем клуб и сакав да му помогнам. Мислам дека имаме добар тим. Верувам дека ќе успееме да влеземе во третата лига“, изјави 35-годишнито Англичанец.
„Да бидам искрен имав понуди од Англија, некои поранешни соиграчи ми кажуваа дека и натаму можам да играм во Премиер или Чемпионшип, имаше и понуда од Саудиска Арабија, но тоа не ме интересираше“, кажа поранешниот англиски репрезентативец.
