Фудбалерите на Челзи претрпеа 44 проценти повеќе повреди откако учествуваа на Светското клупско првенство во САД ова лето, но новиот проширен турнир досега имаше „минимално влијание“ врз повредите, покажуваат резултатите од најновата студија објавена денес.
Многу тренери, играчи, клубови и навивачи се спротивставија на новиот формат на Светското клупско првенство, кое се одржа оваа година со учество на 32 клуба, а фудбалските синдикати предупредија на ментална и физичка исцрпеност на играчите поради големиот број натпревари.
Челзи го освои тој турнир во јули и доби награда од околу 125 милиони долари.
Според Европскиот индекс на повреди во фудбалот, Челзи претрпел 23 повреди меѓу јуни и октомври, далеку повеќе од деветте европски клубови од петте најдобри лиги што учествуваа на Светското клупско првенство во САД.
Меѓу нив е и ѕвездата на лондонскиот тим, Кол Палмер, што доведе до зголемување од 44 проценти на повредите во Челзи во споредба со истиот период минатата година.
И додека Челзи, кој одигра 64 натпревари во сезоната 2024/2025, имаше зголемување на повредите, Индексот, поставен од глобалната осигурителна компанија Хауден, покажа дека имало вкупно намалување на бројот на повредени играчи.
„Во принцип, би очекувале дека зголеменото работно оптоварување би довело до зголемување на бројот на повреди, како и до можно зголемување на сериозноста на повредите. Податоците укажуваат на минимално влијание врз вкупниот број на повреди“, се наведува во извештајот.
И покрај бројките, авторите на извештајот признаа дека е прерано да се процени целосното влијание на Светското клупско првенство, со оглед на тоа што наодите го опфаќаат само периодот до октомври.
