Со читање транскрипти од разговори и СМС пораки во кои се опфатени разговори од 18 април 2012 година почна денешното рочиште за случајот „Монструм“ за убиството на момчињата и рибарот на Смилковското езеро. Разговорите се водат меѓу непознати лица со извесно лице Б.
Пред почетокот на судењето, застапникот на оштетените информира дека вчера имале средба со министерката за правда Рената Десковска, но оти ништо не произлегло од средбата.
Како што претходно најавија од Министерството за правда, на оваа средба министерката детално ќе ги информира семејствата околу преземените дејствија за екстрадиција на лицата од Косово. Оттаму истакнаа дека ги прават сите напори двајцата бегалци од правдата да ги донесе во Македонија, притоа користејќи ги сите законски можности, но и билателарниот договор со Косово.
Судскиот процес го води судијата Огнен Ставрев, а застапници на обвинението се Фатиме Фетаи и Гаврил Бубевски.
За петкратното убиство од 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, во претходна постапка на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.
Врховниот суд во декември 2017 година ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.
