Поранешниот капитен на репрезентацијата на Германија, Бастијан Швајнштајгер ја завршува професионалната кариера како играч. Екс играчот на Баерн и Манчестер Јунајтед, кој во последните две години играше во МЛС, веста ја објави на своите профили на социјалните мрежи.
- Драги навивачи, дојде часот. Ја завршувам кариерата како активен играч на крајот од оваа сезона. Им се заблагодарувам на сите, Баерн, Манчестер Јунајтед, Чикаго и репрезентацијата на Германија. Направивте ова да биде незаборавно за мене. И секако, би сакал да и се заблагодарам на сопругата Ана Ивановиќ и на моето семејство за поддршката. Да му кажеш „збогум“ на фудбалот како активен играч ме прави малку носталгичен, но се радувам за новите предизвици кои се пред мене и со кои ќе се соочам наскоро. Ќе му останам верен на фудбалот, напиша Швајни на социјалните мрежи.
За репрезентацијата на Германија одигра 121 натпревар во периодот од 2004 до 2016 година и беше дел од тимот кој го освои Мундијалот во Бразил во 2014 година.
