На 18 август лидерите на Србија и на Косово ги продолжуваат преговорите во Брисел

05.08.2022
Vesnik.com
На 18 август лидерите на Србија и на Косово ги продолжуваат преговорите во Брисел

„Целта на претстојниот состанок во Брисел е да започне дијалог меѓу Приштина и Белград на највисоко ниво бидејќи тоа е неопходно во овој момент“, изјави портпаролот на ЕК Петер Стано.

Тензиите беа доведени до точка на вриење минатата недела, откако Приштина објави дека Србите од северниот дел на земјата, кои користат српски регистарски таблички на своите автомобили, ќе мора да бараат таблички издадени од косовските институции.

По протестите, таа одлука беше одложена за еден месец, но сепак создава тензија меѓу Србија и Косово, кое прогласи независност од Србија пред 14 години.

Стано рече дека не може да го предвиди исходот од средбата меѓу српскиот претседател Александар Вучиќ и косовскиот премиер Албин Курти, но дека самиот факт што тие доаѓаат во Брисел претставува важен чекор.

Досега Косово го признаа околу сто земји, но не и Србија.

© vesnik.com, правата за текстот се на редакцијата

;