„Над 2.400 дечиња чекааат згрижување во скопските општини затоа што СДСМ и ДУИ не градеа градинки“

14.05.2022
Vesnik.com
„Над 2.400 дечиња чекааат згрижување во скопските општини затоа што СДСМ и ДУИ не градеа градинки“

Пет години неспособност, 5 години неработа на власта на СДСМ и ДУИ, 5 години ниту една изградена градинка. Над 2.400 дечиња чекаат да бидат згрижени во неколку скопски општини, бидејќи изминатите години нема изградено ниту една нова градинка во Скопје, велат од ВМРО-ДПМНЕ.

Тие додаваат дека нема ниту нова градинка, ниту оспособен објект за да се намали бројот на дечиња кои чекаат прием.

– Родителите мака мачат за да ги сместат своите деца во овие воспитно-образовни институции од пред школска возраст. Негрижата на оваа неспособна власт се гледа и во тоа што со месеци не дозволуваат согласности кои се побарани од градинките во скопските општини. Скоро за 90 негователки и персонал во градинките кои треба да се грижат за децата не се одобруваат во Аеродром, Бутел, Гази Баба и Ѓорче Петров, истакнуваат тие.

Од партијата потенцираат дека градоначалниците од скопските општини предводени од ВМРО-ДПМНЕ, иако со опструкции од страна на МТСП и министерката Тренчевска околу согласностите за изградба на градинки, активно работат за решавање на овој реален проблем наталожен од неспособноста на МТСП и претходните градоначалници.

– Во општина Кисела Вода во населбата Усје во тек е приспособување на објект за згрижување на деца од претшколска возраст. Во Аеродром за неколку месеци ќе биде готова новата градинка, додека во Ѓорче Петров се доградува градинката во Волково. Одговорноста за овој голем проблем е единствено на СДСМ и МТСП кои што со години не инвестираа во капацитети за сместување на дечињата од претшколска возраст, нагласија од партијата.

© vesnik.com, правата за текстот се на редакцијата

;