„Јавниот долг со СДСМ ПОРАСНА НА 7,4 МИЛИЈАРДИ ЕВРА“

01.08.2021
„Јавниот долг со СДСМ ПОРАСНА НА 7,4 МИЛИЈАРДИ ЕВРА“

Јавниот долг за три месеци порасна за 213 милиони евра, или достигна 64,4% од БДП, објави министерството за финансии скриено низ табовите на веб страницата, за никој да не го најде. Овој податок е шверцерски објавен, без никакво јавно известување, на сред продолжен викенд, од страна на институцијата која се промовира дека била најтранспарентна, велат од ВМРО-ДПМНЕ во нивното соопштение до јавноста.

Оттаму додаваат дека со ова јавниот долг достигна 7,4 милијарди евра, или за 2,7 милијарди евра повисоко во однос на 2016 година.

– Оваа влада планира да продолжи уште да го задолжува овој народ. Следната година, планираат јавниот долг да достигне 8,5 милијарди евра или скоро 66% од БДП, согласно Стратегијата за управување со јавен долг 2022-2026. Тоа значи дека секое четиричлено семејство догодина ќе биде задолжено со 17.000 евра, потенцираат од партијата.

Во соопштението се посочува дека  за сметка на тоа, никој ништо нема да добие,  капиталните инвестиции се реализирани со бедни 30% за седум месеци, а истовремено се набавуваат автомобили и мебел и се вработуваат во јавната администрација лепачи на партиски плакати.

– Меѓународната заедница и финансиски институции треба да станат свесни дека позајмувањето на пари на оваа гарнитура не се пари за граѓаните, туку пари фрлени во ветер за изживување на партиски пулени, истакнуваат од ВМРО-ДПМНЕ.

© vesnik.com, правата за текстот се на редакцијата