Економијата на Македонија годинава забележа раст од 2,4 отсто, проценува Светска банка во најновиот извештај за глобалните економски перспективи. Економскиот раст во земјава благо ќе се забрза до 2,7 отсто во 2024 година и 2,9 отсто во 2025 година.
Светска банка предвидува дека целиот регион на Западен Балкан годинава ќе ја заврши со економски раст од 2,6 отсто. Клучни фактори кои влијаат на економските перспективи се влијанијата од војната во Украина, пониската лична потрошувачка, заострените глобални финансиски услови и послабата побарувачка во еврозоната.
Од земјите во регионот, годинава најголем економски раст ќе забележат Косово 3,7 отсто и Црна Гора 3,4 отсто. Албанија ќе има раст од 2,8 отсто, Босна и Херцеговина, 2,5 отсто, Србија 2,3 отсто, Хрватска 1,9 отсто, а Бугарија 1,5 отсто.
Во однос на глобалните перспективи, Светска банка очекува годинава економскиот раст да забави и да изнесува 2,1 отсто во однос на минатогодишините 3,1 отсто.
