„Со ова обвинение, владата всушност откри дека сака на оваа земја да и ја одземе демократијата“, изјави денеска во Анкара, Дениз Јуџел, портпарол на Републиканската народна партија (CHP).
Тој рече дека обвинението не е правен акт, туку политички текст насочен кон целата партија.
Имамоглу се смета за најсилниот предизвикувач на турскиот претседател Реџеп Таип Ердоган. Тој беше уапсен во март под обвинение за тероризам и корупција и суспендиран од функцијата градоначалник на Истанбул.
Јавното обвинителство на Истанбул вчера го поднесе обвинението, со кое бара вкупно 2.430 години затвор за 142 кривични дела.
Според обвинението, политичарот е обвинет за основање и водење криминална организација, како и за поткуп и перење пари, покрај други обвиненија, пренесува германската агенција.
Обвинителството бара казни и за повеќе од 400 други осомничени, вклучувајќи ги таткото и синот на Имамоглу. Тие се обвинети за перење пари, што може да резултира со долги затворски казни, објави државната агенција Анадолија.
На списокот се наоѓаат и неколку новинари, соопшти државната агенција.
Меѓу обвинетите новинари е Рушен Чакир, еден од најистакнатите либерално-критички гласови во земјата. Според Анадолоја, тој е обвинет за поддршка на криминална организација, што носи затворска казна до четири години.
Обвинението сепак мора да биде прифатено од судот, иако ова се смета за формалност, јави ДПА.
