Последниот во низата инциденти се случи рано утрово во префектурата Гунма, каде што еден човек бил нападнат во јавен тоалет - само неколку метри од железничката станица.
Претрпел полесни повреди
Според локалните медиуми, 69-годишниот обезбедувач се спремал да излезе од тоалетот кога го забележал дивиот ѕвер. Тој паднал на подот во шок, но успеал да се одбрани од нападот со клоци.
Потоа мечката се свртела и избегала, објавува Гардијан.
Неименуваниот маж претрпел полесни повреди и успеал да стигне до полициска станица за да го пријави инцидентот. Властите истакнуваат дека тоа се случило во област која се смета за релативно урбана и засега безбедна.
Недостаток на извори на храна
Овој случај е најнов во загрижувачка серија. Властите потврдија дека 13 лица се убиени од април, најмногу во историјата откако се водат евиденции. Бројот на напади достигна 197, а експертите веќе очекуваат дека во 2025 година ќе се надмине минатогодишниот рекорд од 219.
Најмногу инциденти се регистрирани во префектурите Акита, Ивате и Фукушима, региони кои со месеци се соочуваат со невообичаено агресивно однесување од дивит животни.
Биолозите предупредуваат дека овогодишната сезона е исклучително лоша во однос на природните извори на храна за мечките. Поради оваа причина, тие почесто се спуштаат во села и градови, им приоѓаат на луѓето и влегуваат во згради во потрага по храна.
Пристигнува војската
Поради сериозноста на ситуацијата, јапонската влада презеде невообичаено остри мерки.
Војска е испратена во префектурата Акита за да им помогне на локалните ловци да ги фатат и отстранат агресивните животни.
За прв пат по години, на полицијата повторно ѝ е дозволено да пука во мечки, бидејќи има недостиг од лиценцирани ловци кои можат да реагираат на терен.
