Изјавата ја даде по петчасовно испрашување во Главното обвинителство, каде што беше пречекан од сопругата и стотици негови поддржувачи.
- Ова ме потсетува на комунистичкиот режим од 50-тите години. Но, ние продолжуваме. Народот е силата. Нема да клекнеме! Сигурно ќе се кандидирам! рече Георгеску, додека неговите поддржувачи аплаудираа.
Тој изјави дека „американските санкции ќе ја расчистат ситуацијата во Романија“ и дека „глобалната корупција ќе биде разоткриена“.
Георгеску, кој победи во анулираниот прв круг на минатогодишните претседателски избори, денеска беше обвинет за шест кривични дела, вклучувајќи активности против уставниот поредок и пропагирање екстремистички идеи.
Поради тоа, му е изречен 60-дневен судски надзор со забрана да ја напушти земјата и да објавува содржини со расистички, антисемитски или фашистички карактер на социјалните мрежи.
На прашањето дали ќе му биде дозволено да се кандидира, Георгеску одговори: Погледнете што се случува. Единствено што е важно е народот. /МИА
