Град Скопје ги уверува граѓаните дека зимската служба будно ја следи состојбата на терен

Екипите на зимската служба на Град Скопје интензивно работат на терен на расчистување на снегот од коловозите и тротоарите на улиците и булеварите, информираат градските власти.

Додаваат дека зимската служба будно ја следи состојбата на терен и ќе интервенира според потребите.

„Град Скопје за оваа зимска сезона обезбеди 4.000 тони сол, што заедно со преостанатите количества од минатата сезона изнесува 4.500 тони сол, како и 300 тони ладен асфалт“, се наведува во соопштението.

Во него се истакнува и дека покрај коловозите, екипите на јавните претпријатија „Комунална хигиена“ и „Паркови и зеленило“ на терен со механизација и рачно го чистат снегот од тротоарите, додека екипите на ЈП „Водовод и канализација“ работат на чистење на сливниците.

„Потсетуваме дека во надлежност на Град Скопје се булеварите и одредени градски улици, а преостанатите улици се во надлежност на општините и тие се задолжени за нивно чистење и одржување“, велат од градот.

И оваа сезона во Скопје ќе биде ангажира дополнителна механизација од 15 камиони, кои се опремени со навигациони уреди и возачи кои ќе ги опслужувааат перманентно во текот на целата сезона.

Градските власти им препорачуваат на возачите да возат внимателно и да се придржуваат на условите на коловозите. Воедно апелираат до граѓаните, куќните совети и сопствениците на деловните објекти да се придржуваат до законската обврска за чистење на снегот од приодите до нивните објекти.

 

извор: Makfax

Поврзани

Најнови вести

Коментари