Локацијата која што повеќе од 20 години беше дива депонија, ќе прерасне во нова зелена површина во Скопје, најави градоначалникот Петре Шилегов кој денеска ја посети локацијата што веќе е исчистена од страна на службите.
„Станува збор за површина од над 6.000 квадратни метри и преку ЈП Улици и патишта во изминатиов период ја исчистивме таа дива депонија и исфрливме повеќе од 15.000 кубни метри смет. Денеска вршиме увид на овој нов јавен простор каде што треба да никне и мал парк и детско игралиште, со цел овој меѓник меѓу општините Аеродром и Центар да го уредиме“, рече Шилегов.
Тој, исто така, упати апел до граѓаните одговорно да се однесуваат со животната средина и отпадот што го создаваат.
„Ги потсетувам граѓаните на Скопје дека Скопје ќе биде онолку убав град колку што ние ќе сакаме сите заедно да го направиме“, порача градоначалникот.
извор: Makfax