Иран ги испраќа во Украина црните кутии од соборениот патнички авион

18.01.2020
vesnik-fb-blue
vesnik-twitter-blue
Иран ги испраќа во Украина црните кутии од соборениот патнички авион

Иран ќе ги испрати во Украина црните кутии од патничкиот авион кој месецов беше по грешка соборен од иранска ракета, објави новинската агенција „Тасним“.

Иранските власти се подготвени да им дозволат на експерти од Франција, Канада и САД да ги анализираат податоците од црните кутии, пренесе агенцијата.

Сите 176 патници и членови на екипажот загинаа во несреќата на украинскиот авион на 8 јануари, кратко време по полетувањето од Техеран кон Киев.

„Со помош на експерти од Франција, Канада и Америка, ќе се обидеме да ги исчитаме податоците за летот во Киев“, изјави за „Тасним“, Хасан Резаифар, шеф на истрагата за несреќата во рамки на иранската Организација за цивилно воздухопловство.

„Ако напорите бидат неуспешни, црните кутии ќе ги испратиме во Франција“, најави Резаифар.

Тој додаде дека во Иран воопшто нема да се анализираат податоците од црните кутии.

Во авионската несреќа загинаа и 57 канадски државјани. Канадскиот премиер Џстин Трудо побара темелна истрага и на прес-конференција во петокот рече дека Иран треба да ги испрати црните кутии за анализа во Франција.

Франција е една од ретките држави што може да ги анализира податоците од летот и од кабината на паднатиот авион, за кои Трудо соопшти дека се тешко оштетени.

Иран е под притисок бидејќи на иранската војска и беа потребни неколку дена да го признае ненамерното уништување на авионите.

Авионот беше соборен во услови кога Иран беше во високо ниво на воена подготвеност, очекувајќи одмазда од САД за ракетните напади врз американските воени бази во Ирак.

Нападите што Иран ги изврши врз базите беа одмазда за американскиот атентат врз иранскиот командант Касем Сулејмани кој на 3. јануари беше убиен од дрон во близина на Багдад.

извор: Makfax

© vesnik.com, правата за текстот се на редакцијата