Да нема раздвојување на Македонија и Албанија, бараат Париз, Берлин и Рим

15.10.2019
vesnik-fb-blue
vesnik-twitter-blue
Да нема раздвојување на Македонија и Албанија, бараат Париз, Берлин и Рим

Се чека секој момент министрите за надворешни работи на ЕУ да ја започнат втората рунда разговори за започнување преговори за членство со  Македонија и Албанија, но ретко кој верува дека денеска ќе биде можна одлука.

На последниот предлог за раздвојување на двете земји и започнување на преговори прво со  Македонија, како што јавува МИА, се противат три земји – Франција, Германија и Италија.

Франција се противи поради тоа што не сака никакво ново проширување пред да се реформира преговарачкиот процес, додека Германија и Италија стравуваат дека доколку преговорите започнат само со Македонија, Албанија „вечно” ќе остане во чекалницата на ЕУ” – изјавиле за МИА дипломати од земја членка на ЕУ.

Холандија, според нив, не се противи на раздвојувањето од Албанија, бидејќи Хаг мора да ја следи одлуката на холандскиот Парламент кој смета дека Скопје е подготвено за преговори, а Тирана не.

Останува дека Холандија сака да го услови отворањето на преговорите со носењето на законот за јавно обвинителство, како што најави утрово шефот на холандската дипломатија Стеф Блок, пред почетокот на министерскиот состанок.

Доколку се дојде до договор за отпочнување на преговорите со Македонија, Хаг би барал првата меѓувладина конференција да се одржи само откако ќе биде задоволено барањето за независно јавно обвинителство.

Дипломатите во Луксембург објаснуваат дека дури и да се постигне компромис за евентуално раздвојување на двете земји, многу се мали шансите тоа да биде сторено денеска, бидејќи француската државна секретарка нема мандат да носи таква одлука. Неа може да ја донесе само францускиот претседател Емануел Макрон на Самитот на ЕУ в четврток и петок во Брисел.

© vesnik.com, правата за текстот се на редакцијата