Заев до претседателот на ИХФ: Ракометот е спорт број 1 во земјава, благодарни сме што организираме светско првенство

16.08.2019
vesnik-fb-blue
vesnik-twitter-blue
Заев до претседателот на ИХФ: Ракометот е спорт број 1 во земјава, благодарни сме што организираме светско првенство

Премиерот Зоран Заев се сретна со претседателот на Светската ракометна федерација (ИХФ) Хасан Мустафа, кој беше придружуван од Живко Мукаетов, претседател на Македонската ракометна федерација (РФМ) и Филип Милошевски, генерален секретар на РФМ.

Како што информираат до владината прес-служба, на средбата Заев ги поздравил сите напори и вложувања што ги прави Ракометната федерација и потенцирал дека ракометот е спорт број еден во нашата држава.

„Светското првенство во ракомет во машка конкуренција до 19 години, кое се одржува во Скопје претставува вистинска афирмација и промоција не само на спортот, туку и на државата во светски рамки“, рекол премиерот Заев кој на присутните им честитал за организацијата на првенството.

Премиерот нагласил дека во иднина ќе се зголемува поддршката со цел дополнително развивање на ракометот и спортот во земјава, а со претседателот на ИХФ разговарал за искуствата од вложувањето во спортот и спортската инфраструктура, оценувајќи дека токму тоа е правецот кој ќе овозможи што поголем број на млади да спортуваат и да се занимаваат со ракомет.

Мустафа и Мукаетов ја поздравиле определбата на Владата за поддршка на спортот и се согласиле дека заеднички ќе работат на остварување на што поголеми резултати во ракометот и промоција на спортот воопшто.

извор: Makfax

© vesnik.com, правата за текстот се на редакцијата