Синиша Михајловиќ ја прекинува професионалната кариера поради болест

Тренерот на Болоња Синиша Михајловиќ ја прекинува професионалната кариера за да се соочи со сериозната болест, објави италијанскиот спортски весник Кориере дело спорт.
Михајловиќ неодамна направил прегледи, по кои лекарите го предупредиле дека лекувањето треба да го продолжи со агресивен третман, се наведува во саботното издание на весникот, кој не прецизира за каква болест станува збор.
Сепак, пишува во текстот, поранешниот селектор на српската фудбалска репрезентација и поранешен играч ќе се огласи со соопштение или ќе одржи прес-конференција, на која ќе ги соопшти деталите.
Педесетгодишниот Михајловиќ дојде во Болоња на крајот на јануари на местото на Пипо Инзаги, па со тимот кој беше меѓу сериозните кандидати за испаѓање во Серија Б, стигна до 10 местото на крајот на шампионатот.