Црпејќи инспирација за украсување од основачките документи на Америка, Џил Бајден ја избра темата „Ние луѓето“ за да ги украси ходниците на Белата куќа и да ги потсети Американците на она што ги обединува во текот на годината, особено за време на празниците, пишува CBS News.
– Го видов тоа каде и да бев. Кога нашата земја е обединета, ние сме посилни. Она што го споделуваме е многу поголемо од работите што не разделуваат. Душата на нашата нација е и отсекогаш била „ние луѓето“ – рече Бајден.
За време на настанот во Белата куќа во понеделникот, првата дама ги откри украсите, на кои работеа повеќе од 150 доброволни декоратори, а планирањето започна уште на пролет.
Украсите вклучуваат повеќе од 83.000 сијалички на дрвја, венци и други прикази. Белата куќа на овој начин е украсена со 77 новогодишни елки и 25 венци на надворешноста на вилата на извршната власт. Копија од Декларацијата за независност е изложена во библиотеката, додека белата куќа од медењаци вклучува реплика од Салата за независност во Филаделфија, каде што беа потпишани Уставот и Декларацијата за независност.
Нов додаток оваа година е менората, која се користи во еврејското обожавање, направена од столари од Белата куќа од дрво отстрането за време на реновирањето од времето на Труман. Менората се наоѓа на државниот кат.
Како дел од Joining Forces, иницијативата на Белата куќа за поддршка на воените семејства, на Џил Бајден и се придружија лидерите на Националната гарда од целата земја, како и нивните семејства.
Се очекува за време на празниците низ Белата куќа да поминат околу 50.000 посетители, вклучувајќи туристи и гости поканети на различни приеми. Меѓу нив ќе биде и францускиот претседател Емануел Макрон, кој во четврток треба да се сретне со претседателот Бајден.
