Ружди, познатиот писател роден во Индија, кој со години се криеше откако Иран ги повика муслиманите да го убијат поради неговиот роман „Сатански стихови“, вчера беше избоден со нож во вратот и торзото на сцената на институцијата Шаутаки, каде што требаше да одржи предавање. По неколкучасовна операција, Ружди бил ставен на респиратор.
Полицијата го идентификува осомничениот, кој моментално е во притвор, како Хади Матар. Станува збор за 24-годишен маж од Фервју, Њу Џерси, кој купил билет за предавањето.
Прелиминарниот полициски преглед на профилите на Матар на социјалните мрежи покажал дека тој имал врски со шиитскиот екстремизам и ИРГЦ, објави NBC, цитирајќи неименуван полициски функционер запознаен со истрагата за нападот.
Матар е роден во Калифорнија, а неодамна се преселил во Њу Џерси, пишува NBC New York, додавајќи дека со себе имал лажна возачка дозвола.
Вчера вечерт, претставници на ФБИ отишле да ја истражат неговата последна пријавена резиденција, во Фервју, округот Берген, кој е одделен од Менхетен со реката Хадсон, објави NBC.
Полицијата во Њујорк и Њу Џерси се уште не одговориле за коментар на извештајот на NBC Њујорк.
Полицијата вчера соопшти дека се уште не е утврден мотивот за нападот на Матар врз Ружди (75), кој пред голема толпа требаше да одржи предавање за уметничката слобода.
Во еден момент, напаѓачот влетал на бината и го нападнал писателот.
Ен-Би-Си Њујорк објави дека полициски функционер рекол дека дефинитивната поврзаност на напаѓачот со ИРГЦ сè уште не е утврдена, но првичната проценка сугерира дека осомничениот бил симпатизер на иранската владина група.
ИРГЦ е моќна фракција која ги контролира деловните империи, како и елитните вооружени и разузнавачки сили, кои Вашингтон ги обвинува дека водат глобална екстремистичка кампања.
Во Иран сè уште нема официјална реакција на владата за нападот врз Ружди, но неколку екстремистички ирански весници го пофалија подвигот на напаѓачот.
Али Техфе, градоначалник на јужниот либански град Јаруна, рече дека осомничениот е син на жител на тој град.
Тој исто така откри дека родителите на осомничениот емигрирале во САД и дека тој е роден и израснат таму.
На прашањето дали осомничениот или неговите родители се поврзани или го поддржуваат либанскиот Хезболах поддржан од Иран, Техфе рече дека „нема информации“ за нивните политички ставови.
Официјален претставник на Хезболах изјави дека либанската вооружена група поддржана од Иран нема дополнителни информации за нападот врз Ружди.
Нападот го осудија бројни писатели и политичари од целиот свет, нарекувајќи го напад на слободата на изразување.
Салман Ружди, чиј мајчин јазик е урду, е роден на 19 јуни 1947 година во Индија, во Мумбаи, во семејство на прогресивни муслимански интелектуалци кои не практикувале религија.
Ги голтал индиските епови и учествувал на религиозни фестивали, и тоа на хинду, муслимански и христијански.
На 13 години отишол да се школува во Англија.
По дипломирањето на Кембриџ, работел во Пакистан како телевизиски продуцент.
Изложен на постојана цензура, се вратил во Лондон, каде што работел во маркетинг.
Неговиот прв познат роман „Полноќни деца“ ја доби Букеровата награда во 1981 година. Потоа ги напиша „Шалима кловнот“ и „Волшебникот од Фиренца““.
На 14 февруари 1989 година, иранскиот ајатолах Рухолах Хомеини ги повика сите муслимани во светот да го убијат бидејќи фундаменталистите оценија дека неговото дело „Сатански стихови“ е богохулно. Принуден да живее илегално и под полициска заштита, постојано менувајќи ги скривалиштата, тој се именувал себеси како Џозеф Антон по неговите омилени писатели Џозеф Конрад и Антон Чехов.
Ружди во своите дела често зборува за Индија и нејзините односи со Западот и го критикува недостатокот на знаменитости, што според него веќе подолго време предизвикува дестабилизација во светот.
Тој бил прогласен за витез од кралицата Елизабета во 2007 година, на големо негодување на муслиманските екстремисти.
