Едно гајле помалку за оние од Македонија кои сакаат или треба да патуваат во државите од ЕУ. По лошите најави дека за влез во ЕУ ќе се бара потполна вакцинација само со западните вакцини, сега се размислува во друг правец и ќе се дозволи слобоно патување во ЕУ за сите кои имаат целосно поминат процес на вакцинација – со било која вакцина.
Тие овде ќе добијат сертификат кој ќе биде на располагање и на институциите во ЕУ.
Дигиталните т.н. „зелени сертификати“, кои треба да станат оперативни во ЕУ до почетокот на летото, ќе бидат издавани за сите вакцини против Ковид-19, а граѓаните на трети земји исто така ќе можат да ги имаат, беше објавено денеска во Брисел.
Европскиот комесар за правда, Дидие Рејндерс, на дебата пред Комитетот за слободи и правда на Европскиот парламент, рече дека главната цел на дигиталните зелени сертификати е да го олеснат слободното движење во ЕУ и да им помогнат на граѓаните да го вратат своето право на слободно патување, на начин прилагоден на здравствената состојба.
Тој во Европскиот парламент додаде дека сите граѓани на ЕУ ќе добијат ист третман кога ќе бидат укинати ограничувањата за патување и дека сертификати ќе се издаваат за сите вакцини, без оглед дали се одобрени од Европската агенција за лекови (ЕМА) или не.
„Земјите-членки ќе бидат обврзани да ги прифатат вакцините кои се одобрени на ниво на ЕУ, но ќе може слободно да ги прифаќаат и сите други вакцини“, нагласи Рејндерс.
Потенцира и дека дигиталните сертификати ќе можат да се користат само за слободно движење и дека секоја друга употреба на национално ниво мора да биде законски утврдена, пропорционална и недискриминаторска.
Хрватска и 12 други членки на Европската Унија веќе постигнаа договор за критериумите за издавање на т.н. ковид-пасоши, односно зелени пасоши, кои би го олесниле протокот на туристи за време на пандемијата, беше објавено вчера.
Зелениот пасош ќе обезбедува информации преку QR-код за тоа дали неговиот носител е вакциниран, тестиран или прележал коронавирус.
