ВМРО-ДПМНЕ апелира, владата да даде поддршка на извозно ориентираните компании.
По нивната посета на стопански објекти во Тетово и Брвеница, од оваа партија реагираат дека владата нема предвидено ниту една мерка или програма за поддршка на извозот и развој на истражувачки и развојни центри.
„Она што го гледаме од средбите со стопанствениците со оние кои што го создаваат националното богатство на Македонија, го полнат буџетот, даваат плати, имаме две вистини, едната е дека имаме исклучително амбициозни луѓе, луѓе коишто сакаат да работат тука во Македонија и да допринесат и од друга страна за жал имаме неодговорна власт и влада која не ги помага овие луѓе. Скоро и да не слушнавме дека луѓето добиваат било каков тип на помош“, истакна потпретседателот на ВМРО-ДПМНЕ Александар Николоски.
„Во однос на рестораните гледаме дека овие мерки поврзани со короната траат скоро година дена. Но она што е проблем е тоа што нема никаква поддршка од државата. Луѓето трпат огромни загуби, имаат вработени кои што сега седат дома, имаат кредити коишто треба да ги плаќаат, а немаат никаква поддршка од државата, што ги доведува на раб на егзистенција“, рече Николоски.
makfax.com.mk
