Oсумдесет проценти од странските директни инвестиции со кои се фали СДСМ се реинвестирана добивка на веќе постоечките инвеститори во државата, кои ги донесе владата на ВМРО-ДПМНЕ, велат од опозицијата, реагирајќи на прес-конференцијата на Костадин Костадинов од СДСМ.
„СДСМ нема направено ништо за економијата. Со оваа влада економијата само тоне, доказ за тоа е и оценката на германските стопанственици, според кои економската политика на СДСМ е оценета со нула. Инвестициите на „Чагатај Кабло“, „ВИК“, „Теламон“ и „Мурат Тичарет“ се инвестиции донесени од страна на ВМРО-ДПМНЕ. Зоран Заев и Стево Пендаровски не направија ништо друго за економијата освен задолжување. За две години државата ја задолжија за над половина милијарда евра. Капитални инвестиции нема, а никој не знае каде отидоа парите за кои не задолжија, а треба да ги враќаат идните генерации“, реагира ВМРО-ДПМНЕ.
Опозициската партија додава дека Заев и Пендаровски допринеле бројот на луѓето кои живеат во сиромаштија во Македонија да се зголеми за над 100.000.
„Платата наместо да се зголеми се намали за 1.200 денари. Заев и Пендаровски се крах за економијата. Гласот за Пендаровски е глас за економски дебакл“, додаде ВМРО-ДПМНЕ.
извор: Makfax