По повод информациите во јавноста дека лекот „Ивермектин“ го нема, ниту може да се најде во аптеките, Вечер.мк дознава дека веќе го има во болничката аптека на КБ Аџибадем Систина наменет за нивните пациенти и оние кои се хоспитализирани во болницата.
Министерството за здравство информира дека стручниот колегиум за ЈЗУ Универзитетска клиника за пулмологија и алергологија и ковид-центрите при интернистичкиот блок, изготви мислење за употребата на лекот „ивермектин“ кај пациенти со Ковид-19. „Протоколот преку Лекарската комора во текот на вчерашниот ден беше испратен до матичните лекари. До крајот на неделата Лекарската комора ќе организира и онлајн предавање за матичните лекари во цела земја за да се дообјаснат протоколите, а веќе следната недела ЛК ќе организира онлајн дискусија со клиничките доктори (лекари кои работат во болници) за употреба на лекот“, соопшти министерството за здравство.
„Ивермектинот“ не е на позитивната листа на лекови кои потпаѓаат на товар на ФЗО. Согласно решението на МАЛМЕД, истиот лек се издава исклучиво на рецепт и се применуваат одредбите за издавање розов рецепт. Министерството за здравство потенцира дека „ивермектинот“ е антипаразитски лек со широк спектар на делување, неговата примена треба да биде исклучиво под лекарски надзор без разлика дали станува збор за домашно лекување или хоспитализација. Оттаму апелираат граѓаните на своја рака да не го пијат лекот „ивермектин“, бидејќи, како што велат, единствено лекар може да утврди дали постојат индикации за користење на лекот и доколку постојат во која доза и во комбинација со кои други лекови може да се користи „ивермектинот“.
