Централната банка на Либан им нареди на банките и другите финансиски институции да обезбедат бескаматни заеми за оштетените од смртоносната експлозија што го потресе Бејрут во вторникот, пренесува „Спутник“.
Според монетарната власт, заемите одобрени во американски долари треба да се вратат во рок од пет години.
Во смртоносната експлозија во либанската престолнина загинаа најмалку 137 луѓе, а околу 5.000 се повредени, според локалните здравствени власти.
Половина од градските згради се сериозно оштетени, а болниците се преполни поради големиот број жртви на експлозијата. Стотици илјади луѓе останаа без покрив над главата.
Голем број на земји во светот, вклучувајќи ги и соседите од Либан од Блискиот Исток, веќе ја понудија својата помош за Бејрут.
извор: Makfax
