Грчката телевизија АНТ1 престана да емитува турски серии на својата програма во текот на летото, како одговор на одлуката на турскиот претседател Реџеп Таип Ердоган да ја претвори Аја Софија во џамија.

Главниот уредник Јоргос Пофантис рече дека одлуката е донесена и наскоро ќе биде претставена нова програма.

Тој објасни дека имало размислувања да продолжат да се емитуваат турски серии во текот на летото, но по „она што се случи со Аја Софија“, донесена е одлука да се забранат сериите.

Да потсетиме дека Ердоган потпиша декрет на 10 јули да ја претвори Аја Софија во џамија, откако Државниот совет ја поништи одлуката донесена во 1934 година со која Аја Софија беше претворена во музеј и ја прогласи за незаконска.

Минатата недела во ова место на богослужба се одржа првата молитва, а фреските и сите христијански симболи беа покриени со завеси.

По одлуката на Ердоган, грчката православна црква веднаш побара од УНЕСКО да ја осуди Турција, а во писмото што го испратија, меѓу другото, се наведува дека со претворање на Аја Софија во џамија, овој споменик на светското наследство повторно се претворил во симбол на освојување.

Најчитани вести